Umuhimu wa Krismasi siyo sherehe pekee

 

Leo ni siku ambayo imezoeleka kote duniani kwa waumini wa Dini ya Kikristo kusherehekea kuzaliwa kwa Yesu Kristo kwa kuhudhuria ibada na baadaye kuwa na sherehe ambazo kwa kiasi kikubwa huhusisha wanafamilia.

Makanisa mengi hufurika waumini tofauti na siku nyingine za ibada na viongozi wa kidini hutumia siku hii kutoa ujumbe mzito wa kukumbusha umuhimu wa siku hiyo katika maisha yao ya kila siku kiimani na katika jamii yao kuwa wanatakiwa watende matendo mema wakati wote na kumheshimu Mungu.

Hata hivyo kwa wengi, mahubiri yote yanayotolewa siku hii huwa ni ya kawaida na yanaonekana kama yamewekwa tu kukamilisha taratibu za ibada na maadhimisho ya Krismasi kabla ya kwenda kwenye sherehe na kesho yake kusahau kama kulikuwa na ujumbe wowote muhimu kwao wakati huu na baadaye.

Ni kutokana na utamaduni huo taifa letu linazidi kuwa na ongezeko kubwa la kuporomoka kwa maadili katika kila kada. Wakati huu, taifa liko kwenye sakata kubwa la uchotaji fedha kwenye Akaunti ya Tegeta Escrow ambalo lilihusisha watu mbalimbali ambao baadhi yao ni waumini ambao wamekuwa wakihudhuria ibada hizo za Krismasi kila mwaka na kukutana na ujumbe unaokumbusha kuwa na maadili mema.

Matukio makubwa yaliyotikisa nchi kama ukiukwaji mkubwa wa haki za binadamu wakati wa Operesheni Tokomeza, mapigano ya wakulima na wafugaji, ongezeko la matumizi ya dawa za kulevya, ujambazi, wizi, rushwa na ufisadi, yameizonga nchi kiasi kwamba maisha yanazidi kuliweka taifa katika sintofahamu. Watendaji wa haya yote ni walewale waumini ambao huingia kwenye nyumba za ibada siku kama za leo na kukumbushwa umuhimu wa kuwa raia wema.

Viongozi wa kanisa, ambao kwa mujibu wa maandiko matakatifu, wanatakiwa watangulie mbele na kondoo kuwafuata nyuma, nao sasa wamekuwa wakiripotiwa kujiingiza kwenye vitendo vya rushwa, ufisadi na wengine biashara za dawa za kulevya. Kondoo sasa wamekosa kiongozi wa kumfuata na matokeo yake kila mtu anafanya analodhani ni sahihi na hivyo nchi kupoteza mwelekeo.

Mambo haya ni lazima yakomeshwe kwa kila njia inayowezekana. Pia, moja ya njia hizo hizo ni kuitumia siku hii ya Krismasi vizuri kwa kuifanya kuwa siku ambayo mahubiri na ujumbe mwingine unaotolewa leo kuwa ni kukumbusha palipokosewa na kutakiwa kufanya nini huko mbele.

Viongozi wa kidini na Serikali watakuwa madhabahuni leo kufanya kazi hiyo ya kukumbusha upendo, amani, mshikamano; kujali yatima, watu wenye ulemavu, wakongwe na maskini; kuepuka ufisadi, rushwa, wizi, na uovu mwingine. Wajibu wetu ni kuufanya ujumbe huo uwe na maana siku zote ili kuipa umuhimu siku hii ya kuzaliwa Yesu Kristo ambaye Wakristo wanaamini alikuja kuokoa wanadamu kutoka katika dhambi ambazo ndizo zinaiyumbisha dunia ya leo.

Kwa kuzingatia hayo, Krismasi haitaishia kwenye sherehe pekee, bali itatusaidia kujenga taifa bora lenye kujali maadili, wema, amani, mshikamano, haki za binadamu, kuwajibika na hali kadhalika kuchukia uovu wa aina zote.