Wabunge vijana wa Lushoto wawalaumu wabunge wa jimbo lao

mcharoman blogy fahar yako mtanzania

Henry Shekifu

Wabunge wa bunge la vijana Wilaya ya Lushoto, wametangaza mgogoro  na wabunge wa majimbo ya Lushoto, Henry Shekifu na January Makamba wa Bumbuli kwamba wameshindwa kuwa kivutio cha maendeleo kwa wananchi wao.

 

Tamko hilo lilitolewa jana na Spika wa  bunge hilo, Frank Shempemba, katika kikao  cha bunge kilichofanyika ukumbi wa vijana uliyopo kijiji cha Mbelei jimbo la Bumbuli wilayani hapa.

 

Shempemba ambaye pia ni Spika wa bunge la vijana la Mkoa wa Tanga na

mjumbe wa UVCCM Wilaya ya Lushoto, alisema wabunge hao hawakuwa kivutio cha maendeleo na badala yake wametanguliza ubinafsi na  kuwagawa  wapigakura.

 

Tamko  hilo limekuja baada ya  wabunge hao wa vijana  kueleza changamoto zinazowakabili katika kutekeleza wajibu wao kwa jamii na wabunge wa majimbo hayo kutajwa kuwa miongoni mwa vikwazo.

 

"Makamba ambaye ni Naibu Waziri  Sayansi na Teknolojia, atakumbukwa kwa kufunga  kiwanda cha chai Mponde na kuwaachia umasikini wakulima na kuwagawa kisiasa wananchi," alisema.

 

Awali akichangia mjadala wa jinsi ya ufuatiliaji wa rasilimali za umma na uwajibikaji kijamii,  Mbunge wa Kata ya Kwemashai, James Mponda,  alielezea mradi wa maji wa  Ngumshi ambao umekwamishwa na Shekifu ambaye pia ni Mwenyekiti wa CCM Mkoa wa Tanga  kutokana na ubinafsi.

 

Mponda  alisema kuwa  mradi huo wenye  thamani ya zaidi ya Sh bilioni 1.6 umepokea Sh. milioni 500. 3  kati ya hizo na wahisani fedha ambazo Shekifu anadaiwa kuzizuia na kuusimamisha kama shinikizo  la  kutaka wananchi  wamchague   tena katika uchaguzi  mkuu ujao.

 

“Tulimfuata kama wabunge wa vijana kutaka kujua sababu ya kusimamishwa mradi huo, akatamka kama tunataka maji tuhakikishe anapita kura za maoni na kumchagua  tena si vinginevyo  kwa kuwa yeye ndiye aliyeomba fedha  hizo Benki ya Dunia” alisema Mponda.