Silima: Watu wote wakiwa mstari wa mbele kudhibiti ajali zitapungua.

mcharoman blogy fahar yako mtanzania
 

Naibu Waziri wa Mambo ya Ndani ya Nchi, Pereira Ame Silima

 

Wizara ya Mambo ya Ndani ya Nchi imesema iwapo watu wote watakuwa mstari wa mbele kudhibiti ajali za barabarani, tatizo hilo litapungua kwa asilimia kubwa.

 

Akizungumza bungeni jana wakati  akijibu swali la nyongeza la Mbunge wa Viti Maalum (CUF), Amina Abdalla Amour, Naibu Waziri wa wizara hiyo,  Pereira Ame Silima, alisema ana uhakika kama wananchi wote watashiriki kudhibiti ajali tatizo hilo litapungua kwa kiasi kikubwa.

 

Katika swali lake, Amour alitaka kujua serikali ina mpango gani wa kuongeza adhabu za makosa ya barabarani hadi kufikia kifungo cha mwaka ama miaka miwili ili kudhibiti ajali za barabarani ambazo zimekuwa zikitokea mara kwa mara nchini.

 

Mbunge huyo alisema ingawa kumekuwa na ufuatiliaji wa kupunguza ajali za barabarani, lakini bado ajali nyingi zinaendelea kutokea nchini.

 

Akizungumzia mikakati ya kupungua ajali, Silima alisema baadhi ya mikakati ilikuwa ianze kutekelezwa Aprili mwaka huu lakini haikufanikiwa kutokana na mgomo wa madereva.

 

Alisema serikali bado inaendelea na majadiliano na madereva ili mikakati hiyo ianze kutekelezwa.

 

Alisema baadhi ya mikakati hiyo inahitaji fedha kwa ajili ya utekelezaji wake.

 

Naye Mbunge wa Kinondoni, Idd Azzan (CCM), alisema ongezeko la ajali limekuwa likisababishwa na wembamba na ubora wa barabara.

 

“Serikali ina mkakati gani wa kuongeza upana wa barabara kwa sababu ajali nyingi zinatokea kutokana na barabara kuwa nyembamba na kusababisha magari kugongana uso kwa uso?”alihoji Azzan.

 

Akijibu, Silima alisema wembamba wa barabara hausababishi ajali za barabarani.

 

 “Tatizo ni uamuzi wa madereva hapa wafanye hivi na hapa wasifanye hivi, tukisimamia sheria na elimu ikatolewa tutapunguza ajali,” alisema. 

                              CHANZO: NIPASHE