Dart yawatimua waathirika wa mafuriko.

mcharoman blogy fahar yako mtanzania

Kaimu Mtendaji Mkuu wa Mradi wa Ujenzi wa Barabara ya Mwendokasi jijini Dar es Salaam (Dart), Dk. Asteria Mlambo.

Kaimu Mtendaji Mkuu wa  Mradi wa Ujenzi wa Barabara ya Mwendokasi jijini Dar es Salaam (Dart), Dk. Asteria Mlambo, amewataka waathirika waliojihifadhi kwenye makalavati ya barabara hizo eneo la Jangwani kuondoka mara moja.

 

Pia amewaagiza watendaji wa Dart kuwaelimisha na kuwashauri waondoke kwa hiyari kwenye maeneo hayo hadi leo jioni kwani si mahali sahihi pa makazi.

 

Dk. Mlambo alisema jana kuwa eneo ambalo wakazi hao wamejihifadhi ni kwa ajili ya matumizi ya barabara na siyo makazi hivyo waondoke.

 

Alisema, watu hao wanaweza kuiharibu miondombinu kwa kuwa haikujengwa kwa ajili ya hifadhi ya watu bali kwa atumizi ya barabara, hivyo shughuli zisizofaa zinazoendelea zitaharibu miundombinu. 

 

“Tayari nimeshawaagiza wafanyakazi wa Dart, waende kuzungumza nao ili waondoke wenyewe kwa hiyari na ifikapo kesho jioni (leo), asionekane mtu yeyote kwenye eneo lile la kituo cha mabasi ya mwendokasi,” alisema Dk. Mlambo.

 

Alisema wamebaini kuwa wakazi hao ni wale ambao walipewa viwanja eneo la Mabwepande wilayani Kinondoni, lakini hawakutaka kwenda huko na pia wengi wao siyo wenye nyumba bali ni wapangaji.

 

“Wakazi wa mabondeni serikali inawajali, lakini wenyewe hawajijali, wamepewa maeneo rasmi hawataki kwenda, wamembiwa wahame, lakini hawataki, sasa sijui wanataka nini,” alisema. 

 

NIPASHE jana lilipita katika eneo la Jangwani na kushuhudia shughuli za kuzoa taka na michanga katika eneo la daraja zikiendelea.

Katika eneo hilo, Wafanyakazi wa Kampuni ya Ujenzi wa Barabara hiyo Strabag, wakiendelea na shughuli za kusafisha eneo hilo huku mvua ikiendelea kunyesha.

 

Rais Jakaya Kikwete, juzi alifika eneo hilo kujionea hali ya mafuriko na  kuwaagiza Wakala wa Barabara Tanzania (Tanroads, kusafisha eneo hilo la daraja kwa kuzoa taka pamoja na mchanga.

 

Rais Kikwete alisema taka pamoja na mchanga uliojaa katika eneo hilo la daraja ndio unasababisha maji kujaa na kusababisha kupita juu ya daraja badala ya chini ya daraja.

 

Afisa Habari wa Tanroads, Asha Malima, alisema wameanza kutekeleza agizo la Rais Kikwete.

 

Malima alisema: “Lile ni agizo la Rais, hivyo sisi tumeshaanza utekelezaji wake na sasa kazi zinaendelea.”

 

Hata hivyo, wakati Dart ikiwatimua wakazi hao, wao wamesema kuwa hawataondoka kwa kuwa kalavati hilo limejengwa kwa kodi zao.